S'espositzione, realizada pro more de unu contributu de sa Fundatzione Bancu de Sardigna, proponet unu percursu cronològicu e tematicu cuncordadu in tres seas diferentes: su Palatzu de Tzitade de Casteddu, su Museu MAN de Nùgoro, sa bidda de Ulassa. Torrare a cosire su mundu est sa prima retrospetiva cumpleta dedicada a s'artista, cun prus de treghentas òperas dae regortas privadas e pùblicas.

Casteddu –  Palatzu de Tzitade (Inàugurat giòbia 10 de trìulas)

Su Palatu de Tzitade de Casteddu acollit sa prima parte de su progetu, contivigiadu dae Anna Maria Montaldo, diretora de sos museos tzìvicos, dedicadu a sa produtzione de s'artista dae sos annos  Baranta a sos annos Otantade su sèculu passadu. Su percursu de sa mustra est partzidu in àreas temàticas, movende dae sos disinnos a pinna o a lapis de sos annos Baranta pro nche lòmpere a sas pinturas a tèmpera dedicadas a su traballu de sas fèminas, a sa produtzione ligada a su tessìngiu (lavàgnas, libros cosidos, geografias), finas a nch'arribare a sos Paesàgios, sas Terrallas, sos Panes, sos Presèpios e sos Telàrgios de sos annos Setanta. In Casteddu ant a presentare materiale documentàriu puru, cun intervistas e filmados de archìviu pro cumprèndere mèngius sas tapas prus importantes de su caminu artìsticu de Maria Lai. In mesu de custos filmados b’at a èssere finas su vìdeo famadu de s’atzione artìstica colletiva Legarsi alla montagna, realizada in Ulassa in su 1981, chi est istadu unu mamentu fundamentale in s’isvilupu de sos limbàgios de s’artista e chi sos organizadores de sa mustra ant pensadu comente elementu chi podet ligare apare e cullegare sas tres sedes de su progetu.

Nùgoro – Museu MAN (Inàugurat chenàbura 11 de trìulas)

Su MAN de Nùgoro acollit sa segunda parte de sa mustra, contivigiada dae Barbara Casavecchia e Lorenzo Giusti, diretore de su museu, chi est dedicada a s’arte de Maria Lai a pustis de sos primos annos Otanta, unu mamentu forte de inbentiva de s’artista, in sintonia cun sos isvilupos de sas chircas internatzionales in s’àmbitu de s’arte de relatzione, performativa e pùbblica. In sa mustra ant a èssere presentados, a parte Legarsi alla montagna, àteros interventos de arte ambientale realizados a pustis, comente La disfatta dei varani(Camerino, 1983) e Essere è Tessere (Aggius, 2008). Sa mustra acrarit sas tapas prus importantes de custu percursu ammustrende òperas, materiale documentàriu, fotos e videos, cunfrontende sa chirca fata dae Maria Lai in su campu de su treatu e de s’arte performativa. Un’àteru puntu de importu de su percursu de sa mustra (chi includit àteras sèries fundamentales de traballos comente Lenzuoli, Libri cuciti e d’artista, Geografie e Telai) est sa relatzione cun su mundu de sa pitzinnia e de sa didàtica, chi Maria Lai at esploradu cun sa produtzione de paristòrias, libros, giogos e laboratòrios, punnende a interessare cada genia de pùbblicu a sa riflessione subra su pòdere liberante de s’arte, giai dae sende minore.

Claudia Losi & Antonio Marras –che abigheddas operajas

Unu progetu ispetziale, nàschidu dae una collaboratzione intre s’artista Claudia Losi e s’istilista Antonio Marras,  amigu e collaboradore de Maria Lai, chi aunit cun s’idea sas seas de Casteddu e Nùgoro. In Casteddu s’interventu cullegat sa fatzada de su museu e sas carreras a fùrriu cun su pianu de giosso de una sala. A chirru de intro de sa sala b’at a èssere un’òpera de Lai chi s’at a pòder bìdere a de note puru. In Nùgoro, unu tessìngiu de filos de metallu at a partire dae fora de su MAN e posca, intrende dae muros e bentanas, at a ligare una galàssia de trastigheddos (billeteddos de augùrios, gràficas, prendas, pannias, ricamos), fatos dae Maria Lai in totu sa vida e chi aiat regaladu a amigos e parentes, chi ispiegant su ruolu de artista ativa in sa comunidade sua, chi ponet a cumone e ispartinat de bonucoro s’òpera sua.

Ulassa – Un’Istatzione pro s’arte (Inàugurat sàbadu 12 de trìulas)

Un’àtera sea de su progetu est sa bidda de Ulassa, chi presentat duas ocasiones de bìsita, cun su coordinamentu de Cristiana Giglio, diretora de s’Istatzione de s’Arte”. Sa prima est in s’istatzione betza, chi oe est sa sea de su museu dedicadu a Maria Lai, in ue sos ispàtzios ant a èssere sestados sighende su progetu originale de Maria Lai, cun una sala dedicada a sas cartas geogràficas, una cun sos tributos a sos mastros(Serbadore Cambosu, Giusepe Dessì, Arturo Martini)e una cun s’installatzione artìstica Invito a tavola.  S’àtera ocasione de bìsita pertocat sos interventos artìsticos ambientales in sa bidda de Ulassa, fatos dae sos annos Otanta in goi. Sa die de s’inauguratzione b’at a èssere unu servìtziu de trasportu pro cullegare totus sos sitos gai chi sos bisitadores s’ant a pòdere mòvere in intro de un’ispètzia de museu in fora de domo, cun òperas che a La strada delle capre cucite, Il gioco del volo dell’oca, il Telaio soffitto del lavatoio e àteras. B’ant a èssere fintzas cartellos informativos cun percursos pro fatzilitare sa bìsita.