Su traballu est nàschidu dae un’abboju de su colletivu bolognesu, fatu in su 2006, cun s’iscritore sardu, autore de su romanzu famadu Padre Padrone (1975). Ledda est impignadu dae annos in una chirca personale subra de s’essèntzia de su limbàgiu e, gràtzias a s’interventu de Zimmerfrei, cumponet unu paesàgiu sonoru in ue sas paràulas pronuntziadas nche pigant sa matessi cunsistèntzia de sas cosas, resonende in unu ispàtziu iscurigadu, che  ogetos materiales chi s’imbenint a pare movende·si in s’iscuru. In sa bisione de Gavinu Ledda sas paràulas pronuntziadas (pietre, cavalla, acqua, guazza, bava e buoi…) sunt comente colores, un’abbecedàriu mìnimu de sinni, colores de sa limba sarda chi su sonu faghet frorire.

Sa maieutica de s’iscritore, pastore pitzinnu chi numenat su chi bìdet dae chi est leende possessu de su mundu e esse·nde·si·nche dae sa lege de su babbu-patriarca, est innida e abberelada. Su territòriu iscumbatadu dae Zimmerfrei est fatu de matèria, e su sonu est sa parte de sa matèria chi si nche podet bogare dae sas cosas e pònnere in àteros giassos chena chi mudent sa natura issoro.

ZimmerFrei naschet in Bologna in su 2000 dae s’abboju de Anna Rispoli, regista teatrale e atora, Anna De Manicor, autora de videos, e su progetista de su sonu Massimo Carozzi. Su colletivu faghet un’indagine de su paesàgiu naturale, de sa tzitade e de s’universu sotziale de oe individuende onzi borta immàgines, contos e tonalidades emotivas pro mèdiu de sa produtzione de òperas de mannàrias diferentes (ambientes sonoros, installatziones video, rapresentaztiones, ispetàculos multimediales, documentàrios e sèries fotogràficas). Custa est un’esploratzione de su tempus presente, ligada meda a s’idea de “permanèntzia”, de un’iscuta de tempus coladu annotende e vivende a cuntatu cun unu logu determinadu, chi mustrat sa cumplessidade, sos tretos oscurosos, sos istratos de tempos e ispàtzios, sas istòrias e sa potèntzia simbòlica de sos logos.

Gavinu Ledda nàschidu in Sìligo in su 1938, est iscritore, linguista e istudiosu de sa limba italiana e de sa limba sarda. A pustis de sa pitzinnia colada in campagna cun su babbu pastore, si liberat a mannu dae èssere legu e si làureat in glotologia in s’Universidade "La Sapienza" de Roma. In su 1970 l’ammitint a s’”Accademia della Crusca” e s’annu in fatu lu numenant assistente de filologia romanza in s’Universidade de Casteddu. A pustis galu, contat su contu de sa vida sua in su romanzu Padre padrone. Su libru tenet sutzessu e lu traduint in baranta limbas. In su 1977 sos registas frades Taviani nde faghent unu film-.

So sìnnoso, fròrese de su sonu est realizadu paris cun Venticinquegradi. Su 25 de Satugaine, a sas noe de sero, in s’ispàtziu de Vico delle Acacie 5 (Salina/Casteddu/Parcu de Molentàrgius), Zimmerfrei presentat “Safari”, una seletzione de un archìviu de registratziones sonoras regortas in vàrias partes de su mundu in sos ùrtimos deghe annos.